ప్రముఖ యూట్యూబర్ ధ్రువ్ రాఠీ తనను పోలీసులు అనధికారికంగా గృహ నిర్బంధంలో ఉంచారని ఆరోపించారు. తన ఇంటి బయట సుమారు 50 మంది పోలీసులను మోహరించారని, తాను ఎక్కడికి వెళ్లినా పోలీసులు వెంటపడుతున్నారని ఆయన వెల్లడించారు. నిరసన కార్యక్రమానికి సమీపంలోకి వెళ్తే మళ్లీ అదుపులోకి తీసుకుంటామని పోలీసులు హెచ్చరిస్తున్నారని ఆరోపించారు. ఈ విషయాలను ‘ది లల్లన్‌టాప్‌’కు ఇచ్చిన ఇంటర్వ్యూలో ఆయన తెలిపారు.
సోమవారం ఢిల్లీలో ప్రతిపక్ష కూటమి ‘ఇండియా’ (INDIA) చేపట్టనున్న నిరసన ర్యాలీలో పాల్గొనాలని తాను భావించినట్లు ధ్రువ్ రాఠీ చెప్పారు. చీఫ్ ఎలక్షన్ కమిషనర్ (CEC) జ్ఞానేశ్ కుమార్ రాజీనామా చేయాలని, ఓటర్ల జాబితాల ప్రత్యేక సమగ్ర సవరణ (SIR) ప్రక్రియలో జరిగినట్లు ఆరోపిస్తున్న అవకతవకలపై చర్యలు తీసుకోవాలని డిమాండ్ చేస్తూ ఈ ర్యాలీ నిర్వహించనున్నారు.
అయితే, శనివారం జంతర్ మంతర్ వద్ద ‘కాక్‌రొచ్ జనతా పార్టీ’ (CJP) నిర్వహించ తలపెట్టిన నిరసనకు ముందు ధ్రువ్ రాఠీని పోలీసులు అదుపులోకి తీసుకున్నారు. గురుగ్రామ్‌లోని ఆయన నివాసం నుంచి సాధారణ దుస్తుల్లో వచ్చిన పోలీసులు తీసుకెళ్లారని ఆయన ఆరోపించారు. వివిధ పోలీస్ స్టేషన్లకు తిప్పారని, సుమారు 22 నుంచి 23 గంటలపాటు తన ఫోన్‌ను ఉపయోగించేందుకు, న్యాయవాదిని సంప్రదించేందుకు అనుమతించలేదని పేర్కొన్నారు. ఈ చర్యను ఆయన “కిడ్నాప్”గా అభివర్ణించారు.
శనివారం అదుపులోకి తీసుకున్న ధ్రువ్ రాఠీని ఆదివారం తెల్లవారుజామున సుమారు 3 గంటలకు విడుదల చేసినట్లు అధికారులు తెలిపారు. ఆయనను కుటుంబ సభ్యులకు అప్పగించినట్లు వెల్లడించారు. ఢిల్లీలో ముందస్తు ఆంక్షలు అమల్లో ఉన్న నేపథ్యంలో, నిరసనకు వెళ్లి శాంతిభద్రతల సమస్యలు సృష్టించకుండా నిరోధించేందుకే ఈ చర్య తీసుకున్నట్లు పోలీసు వర్గాలు తెలిపాయి. అయితే, తనను నిర్బంధించిన తీరుపై ధ్రువ్ రాఠీ తీవ్ర అభ్యంతరం వ్యక్తం చేశారు.
సోమవారం కూడా ఢిల్లీలో భద్రతను కట్టుదిట్టం చేశారు. ఇండియా కూటమి ర్యాలీ నేపథ్యంలో 30 వేల మందికి పైగా పోలీసులు, పారామిలిటరీ సిబ్బందిని మోహరించినట్లు కథనం పేర్కొంది. భద్రతా ఏర్పాట్లలో భాగంగా ఆరు మెట్రో స్టేషన్ల ప్రవేశ, నిష్క్రమణ ద్వారాలను మధ్యాహ్నం 4 గంటల వరకు మూసివేయనున్నట్లు అధికారులు తెలిపారు. రైల్వే స్టేషన్లు, బస్ టెర్మినళ్లు, నగర సరిహద్దుల్లోనూ నిఘా పెంచారు.