నితీష్ తివారీ దర్శకత్వంలో తెరకెక్కిన భారీ పౌరాణిక చిత్రం ‘రామాయణం: రైజ్ ఆఫ్ ఎ లెజెండ్’ ప్రపంచవ్యాప్తంగా విడుదలైంది. రణబీర్ కపూర్ రాముడిగా, సాయి పల్లవి సీతగా, యష్ రావణుడిగా నటించిన ఈ సినిమా ప్రేక్షకులకు అద్భుతమైన సినిమాటిక్ అనుభూతిని అందిస్తోందని ఇండియా టుడే తన రివ్యూలో పేర్కొంది. భారీ విజువల్స్, భావోద్వేగ సన్నివేశాలు, అద్భుతమైన సంగీతం ఈ చిత్రానికి ప్రధాన ఆకర్షణలుగా నిలిచాయని తెలిపింది.
భారతీయుల సాంస్కృతిక జీవితంలో రామాయణానికి ప్రత్యేక స్థానం ఉంది. తరతరాలుగా వింటూ, చూస్తూ పెరిగిన ఈ ఇతిహాసాన్ని మరోసారి ప్రేక్షకుల ముందుకు తీసుకురావడం దర్శకుడు నితీష్ తివారీకి పెద్ద సవాలుగా మారింది. కేవలం పాత కథను మళ్లీ చెప్పడం కాకుండా, నేటి ప్రేక్షకులు కూడా కొత్త అనుభూతిని పొందేలా ఈ చిత్రాన్ని రూపొందించారు. భారీ తారాగణం, అత్యున్నత సాంకేతికత, విస్తృతమైన సెట్స్‌తో సినిమాను అద్భుతమైన స్థాయిలో తెరకెక్కించారు.
ఈ కథ శ్రీరాముడు, సీతాదేవి, రావణుడి చుట్టూ తిరుగుతుంది. విష్ణుమూర్తి మానవ అవతారమైన శ్రీరాముడు అయోధ్య రాజు దశరథుడు, కౌసల్య దంపతులకు జన్మిస్తాడు. చిన్నతనం నుంచే యుద్ధవిద్యలు, ఆయుధ విద్యలో ప్రావీణ్యం సంపాదిస్తాడు. అయితే రాముడి గొప్పతనం కేవలం విలువిద్యలోనే ఉండదు. కుటుంబ సంబంధాల పట్ల ప్రేమ, ఇతరుల పట్ల గౌరవం, ధర్మం కోసం నిలబడే తత్వం ఆయన వ్యక్తిత్వాన్ని ప్రత్యేకంగా నిలబెడతాయి.
మిథిలా రాజు జనకుడి కుమార్తె సీతను స్వయంవరంలో గెలుచుకుని రాముడు వివాహం చేసుకుంటాడు. లక్ష్మణుడు రాముడికి ఎప్పుడూ తోడుగా ఉంటాడు. అయితే రాముడికి పట్టాభిషేకం జరగాల్సిన సమయంలో కైకేయి తనకు దశరథుడు ఇచ్చిన రెండు వరాలను గుర్తుచేస్తుంది. వాటి ప్రకారం రాముడిని 14 ఏళ్ల పాటు అరణ్యవాసానికి పంపించాలని కోరుతుంది. తండ్రి మాటకు కట్టుబడి రాముడు ఎలాంటి అభ్యంతరం లేకుండా అరణ్యవాసానికి సిద్ధమవుతాడు. సీత, లక్ష్మణుడు కూడా ఆయనతో అడవులకు వెళ్తారు.
ఆ తర్వాత లంకాధిపతి రావణుడు సీతను అపహరిస్తాడు. బ్రహ్మదేవుడి వరం, శక్తివంతమైన ఆయుధాలు, అజేయమైన సైన్యం కలిగిన రావణుడితో రాముడు యుద్ధానికి సిద్ధమవుతాడు. సీతను తిరిగి తీసుకురావడంతో పాటు రావణుడి పాలనకు ముగింపు పలకాలని రాముడు, లక్ష్మణుడు సంకల్పిస్తారు.
ఈ కథను తెరపై ఆవిష్కరించిన తీరు సినిమాలో ప్రధాన ఆకర్షణగా నిలిచింది. ముఖ్యంగా రణబీర్ కపూర్ రాముడిగా రాక్షసులతో పోరాడే యాక్షన్ సన్నివేశాలు ప్రేక్షకులను ఆకట్టుకుంటాయి. యుద్ధ సన్నివేశాల చిత్రీకరణ, పోరాటాల కొరియోగ్రఫీ, విజువల్ ఎఫెక్ట్స్ అద్భుతంగా ఉన్నాయి. ఈ సన్నివేశాలకు హాలీవుడ్ సంగీత దర్శకుడు హాన్స్ జిమ్మర్ అందించిన నేపథ్య సంగీతం మరింత బలాన్ని చేకూర్చింది.
సుమారు రూ.2,000 కోట్ల భారీ బడ్జెట్‌తో రూపొందిన ఈ సినిమా విజువల్ గ్రాండియర్ ప్రతి ఫ్రేమ్‌లో కనిపిస్తుంది. రాజ్యాలు, ప్రకృతి దృశ్యాలు, భవనాలు, ఆయుధాలు, వింత జీవులు, స్వర్గలోకాలను ఎంతో భారీ స్థాయిలో రూపొందించారు. ట్రైలర్లలో చూపించిన దానికంటే సినిమాలో మరిన్ని అద్భుతమైన ప్రపంచాలు ప్రేక్షకులకు కనిపిస్తాయి.
అయితే సినిమాలో కొన్ని లోపాలు కూడా ఉన్నాయి. ముఖ్యంగా ఏఐ సాయంతో రూపొందించిన కొన్ని విజువల్స్ సహజత్వానికి దూరంగా కనిపించాయి. ఖరదూషణుడు, కుంభకర్ణుడు వంటి పాత్రల రూపకల్పన కొన్ని చోట్ల కార్టూన్ తరహాలో అనిపిస్తుందని విమర్శించింది. భారీ స్థాయి విజువల్ అనుభూతిని అందించాలనుకున్న సినిమాలో ఇలాంటి కృత్రిమ దృశ్యాలు కొంత నిరాశ కలిగిస్తాయి.
సినిమాలో భావోద్వేగాలకు కూడా దర్శకుడు ప్రాధాన్యత ఇచ్చారు. ముఖ్యంగా దశరథుడు, రాముడి మధ్య వచ్చే సన్నివేశాలు హృదయాన్ని తాకుతాయి. అయోధ్యను విడిచి రాముడు అరణ్యవాసానికి వెళ్లే సమయంలో తండ్రి పడే బాధ, కొడుకును ఆపలేని నిస్సహాయత, చివరకు దశరథుడి మరణం వంటి సన్నివేశాలు ప్రేక్షకులను భావోద్వేగానికి గురిచేస్తాయి. భారీ యుద్ధాలు, అద్భుతమైన విజువల్స్ మధ్య ఇలాంటి కుటుంబ సంబంధాల సన్నివేశాలు సినిమాకు ప్రత్యేకమైన బలంగా నిలుస్తాయి.
రణబీర్ కపూర్ రాముడి పాత్రలో మొదట్లో ఎలా కనిపిస్తారనే సందేహాలు ప్రేక్షకుల్లో ఉన్నప్పటికీ, సినిమా ముందుకు సాగుతున్న కొద్దీ ఆయన ఆ పాత్రలో ఒదిగిపోయారు. రాముడి పాత్రకు అవసరమైన ప్రశాంతత, హుందాతనం, భావోద్వేగాలను రణబీర్ చక్కగా పలికించారు. ముఖ్యంగా ఎమోషనల్ సన్నివేశాల్లో అతిగా నటించకుండా, తన హావభావాలతో పాత్రకు న్యాయం చేశారు.
సీత పాత్రలో సాయి పల్లవి తనదైన ముద్ర వేశారు. ఈ సినిమాలో సీతను కేవలం కష్టాలను భరించే స్త్రీగా మాత్రమే చూపించలేదు. ఆమెను వైద్యురాలిగా, ధైర్యవంతురాలిగా, అవసరమైనప్పుడు శత్రువులతో పోరాడే యోధురాలిగా కూడా చిత్రీకరించారు. రావణుడు అపహరించి లంకకు తీసుకెళ్లినప్పటికీ సీత తన ఆత్మగౌరవాన్ని, ధైర్యాన్ని కోల్పోదు. సాయి పల్లవి సహజమైన నటన, పాత్రకు తగిన రూపం ఆకట్టుకుంటాయి.
లక్ష్మణుడి పాత్రలో రవీ దూబే ప్రత్యేకంగా ప్రశంసలు అందుకున్నారు. ఆయన నటన సినిమాలో మరో ప్రధాన ఆకర్షణగా నిలిచింది. లక్ష్మణుడిలోని అన్నపై ప్రేమ, భావోద్వేగాలు, బాధ్యత, అవసరమైనప్పుడు చూపించే ఆవేశాన్ని చక్కగా ప్రదర్శించారు. ముఖ్యంగా బంగారు జింక వెంట రాముడు వెళ్లినప్పుడు సీతను ఒంటరిగా వదిలి వెళ్లలేనని వివరించే సన్నివేశంలో ఆయన నటన ఆకట్టుకుంటోంది.
ఇక రావణుడి పాత్రలో యష్ తనదైన శైలిలో మెప్పించారు. రావణుడిలో ఉండే కోపం, అహంకారం, గర్వం, ఆకర్షణీయమైన వ్యక్తిత్వాన్ని తెరపై అద్భుతంగా ప్రదర్శించారు. మూడు లోకాలకు అధిపతిగా చెప్పుకునే త్రిలోకపతికి ఉండాల్సిన గంభీరమైన రూపం, శరీర భాష యష్‌లో కనిపించాయి. ముఖ్యంగా తొలిసారి సీతను చూసే సన్నివేశంలో ఆయన కళ్లలో కనిపించే భావాలు ఆకట్టుకుంటాయి. మాటలతోనో, అరుపులతోనో కాకుండా కేవలం తన ఉనికితోనే సన్నివేశాన్ని ప్రభావితం చేయగలిగారు.
సంగీతం విషయానికి వస్తే హాన్స్ జిమ్మర్ అందించిన నేపథ్య సంగీతం సినిమాకు అతిపెద్ద బలంగా నిలిచింది. యుద్ధ సన్నివేశాలు, భావోద్వేగ ఘట్టాల్లో ఆయన సంగీతం కథను మరో స్థాయికి తీసుకెళ్తుంది. ఏఆర్ రెహమాన్ స్వరపరిచిన పాటలు కూడా కథలో భాగమైన తర్వాత మరింత ఆకట్టుకుంటాయి. ముఖ్యంగా ‘జుడీ జోడీ’, ‘ధర్తీ హై అంబర్ హై’, ‘మంగళ్ రంగ్’ పాటలు సినిమా చూస్తున్నప్పుడు మంచి అనుభూతిని అందిస్తాయి.
దాదాపు మూడు గంటల నిడివి ఉన్న ఈ సినిమా ప్రేక్షకులకు ఎన్నో అద్భుతమైన అనుభూతులను అందిస్తుంది. కొన్ని విజువల్ ఎఫెక్ట్స్ విషయంలో మరింత జాగ్రత్త తీసుకోవాల్సి ఉన్నప్పటికీ, దర్శకుడు సాధించిన విజయం మాత్రం ప్రశంసనీయం. ఈ సినిమా నిర్మాణం, నటీనటుల ఎంపిక, సంగీతం, కథను చూపించిన విధానం అన్నీ భారీ అంచనాలను అందుకునేలా ఉన్నాయి.
మొత్తంగా రామాయణం అనేది కేవలం రాముడు రావణుడిపై సాధించిన విజయానికి సంబంధించిన కథ మాత్రమే కాదు. ధర్మం కోసం రాముడు తీసుకున్న నిర్ణయాలు, సీత చూపించిన ధైర్యం, లక్ష్మణుడి అంకితభావం, తరతరాలుగా కోట్లాది మంది ప్రజలు ఈ ఇతిహాసంపై చూపిస్తున్న విశ్వాసం గురించి చెప్పే కథ. ఆ భావోద్వేగాలను మరోసారి ప్రేక్షకులకు గుర్తుచేయడంలో నితీష్ తివారీ తెరకెక్కించిన ‘రామాయణం’ చాలావరకు విజయం సాధించింది.