ప్రముఖ భారతీయ సాఫ్ట్‌వేర్ సంస్థ జోహో ఈ ఏడాది ఉద్యోగులకు సాధారణంగా ఇచ్చే వార్షిక జీతాల పెంపును నిలిపివేయాలని నిర్ణయించింది. సంస్థ వ్యవస్థాపకుడు శ్రీధర్ వెంబు ఈ విషయాన్ని వెల్లడించారు. ఆర్టిఫిషియల్ ఇంటెలిజెన్స్ (AI) వినియోగం పెరగడం, సర్వర్ ఖర్చులు భారీగా పెరగడం, సాఫ్ట్‌వేర్ రంగంలో వ్యాపార పరిస్థితులు అనిశ్చితంగా మారడంతో ఖర్చులను నియంత్రించాల్సిన పరిస్థితి ఏర్పడిందని తెలిపారు. ఈ నిర్ణయం తీసుకోవడం తనకు కూడా బాధ కలిగించిందని, ఉద్యోగులకు క్షమాపణలు చెప్పినట్లు పేర్కొన్నారు.
శ్రీధర్ వెంబు తన సోషల్ మీడియా ఖాతా ‘ఎక్స్‌’లో సంస్థ ఎదుర్కొంటున్న పరిస్థితులను వివరించారు. డేటా సెంటర్లకు అవసరమైన సర్వర్ల ధరలు గతంతో పోలిస్తే నాలుగు రెట్లు పెరిగాయని తెలిపారు. అదే సమయంలో AI వినియోగం వేగంగా పెరుగుతుండటంతో సంస్థ నిర్వహణ ఖర్చులు కూడా అధికమవుతున్నాయని చెప్పారు. అంతర్జాతీయ రాజకీయ పరిస్థితులు కూడా వ్యాపార రంగంపై ప్రభావం చూపుతున్నాయని పేర్కొన్నారు.
ఖర్చులను తగ్గించేందుకు ఇప్పటికే మార్కెటింగ్ బడ్జెట్‌ను తగ్గించినట్లు వెంబు వెల్లడించారు. ఈ ఏడాది ఉద్యోగులకు సాధారణంగా ఇచ్చే జీతాల పెంపును అందించలేమని తెలియజేసినట్లు చెప్పారు. ఈ నిర్ణయాన్ని తప్పించలేకపోయినందుకు ఉద్యోగులకు క్షమాపణలు చెప్పినట్లు వివరించారు. పరిస్థితిని అర్థం చేసుకుంటున్న ఉద్యోగులకు కృతజ్ఞతలు తెలిపారు.
అయితే, ఉద్యోగులకు జీతాల పెంపు నిలిపివేయడంతో పాటు భారీ స్థాయిలో ఉద్యోగులను తొలగించకుండా ఉండేందుకు సంస్థ గట్టిగా ప్రయత్నిస్తోందని శ్రీధర్ వెంబు స్పష్టం చేశారు. సాఫ్ట్‌వేర్ రంగంలో ఉద్యోగ అవకాశాల భవిష్యత్తు ఆందోళనకరంగా ఉందని హెచ్చరించారు. గత 18 నెలలుగా జోహోలో ఉద్యోగుల సంఖ్యను పెంచలేదని వెల్లడించారు.
ప్రస్తుతం జోహో సంస్థ తన వ్యాపార విధానాలను మార్చుకుని, కొత్త పరిస్థితులకు అనుగుణంగా మారే ప్రయత్నంలో ఉందని వెంబు తెలిపారు. రాబోయే మూడు నుంచి ఐదేళ్ల కాలం సంస్థ తీసుకుంటున్న మార్పులు ఎంతవరకు ఫలితాలనిస్తాయో నిర్ణయిస్తుందని పేర్కొన్నారు. ఈ మార్పులు విజయవంతం కావాలని ప్రార్థించాలని ఆయన తన సోషల్ మీడియా పోస్టులో కోరారు.