బ్రిక్స్ న్యూఢిల్లీ డిక్లరేషన్‌ను సభ్య దేశాలన్నీ ఏకగ్రీవంగా ఆమోదించడం ప్రపంచానికి భారత్‌పై పెరుగుతున్న నమ్మకానికి నిదర్శనమని ప్రధాని నరేంద్ర మోదీ అన్నారు. న్యూఢిల్లీలో జరుగుతున్న సెమీకాన్ ఇండియా 2026 కార్యక్రమంలో మాట్లాడిన ఆయన.. ఇటీవల భారత్ ఆతిథ్యమిచ్చిన 18వ బ్రిక్స్ శిఖరాగ్ర సదస్సును ప్రస్తావిస్తూ ఈ వ్యాఖ్యలు చేశారు.
భారత్ విజయవంతంగా బ్రిక్స్ సదస్సును నిర్వహించిందని ప్రధాని మోదీ పేర్కొన్నారు. సదస్సులో న్యూఢిల్లీ డిక్లరేషన్‌ను అన్ని సభ్య దేశాలు ఏకాభిప్రాయంతో ఆమోదించడం భారతదేశంపై అంతర్జాతీయంగా పెరుగుతున్న విశ్వాసానికి మరో ప్రధాన నిదర్శనమని చెప్పారు. సెప్టెంబర్‌ 12, 13 తేదీల్లో న్యూఢిల్లీలో జరిగిన ఈ సదస్సులో బ్రిక్స్ దేశాలు పలు కీలక అంతర్జాతీయ అంశాలపై ఉమ్మడి ప్రకటనను ఆమోదించాయి.
భారత్ ఆర్థిక వ్యవస్థ కూడా సవాళ్ల మధ్య బలమైన వృద్ధిని నమోదు చేస్తోందని మోదీ అన్నారు. తాజా త్రైమాసిక జీడీపీ వృద్ధి 7.8 శాతంగా నమోదైందని పేర్కొన్నారు. అదే సమయంలో జపాన్‌కు చెందిన క్రెడిట్ రేటింగ్ సంస్థ భారత్ సార్వభౌమ రేటింగ్‌ను సుమారు 35 ఏళ్ల తర్వాత పెంచిందని చెప్పారు. ఈ పరిణామాలు భారత్‌పై అంతర్జాతీయ విశ్వాసం పెరుగుతున్నదానికి సంకేతాలని మోదీ పేర్కొన్నారు.
ప్రపంచవ్యాప్తంగా భారత్ ప్రాధాన్యత పెరుగుతోందని మోదీ అన్నారు. అంతర్జాతీయ దౌత్యంతో పాటు సెమీకండక్టర్లు వంటి కీలక పారిశ్రామిక రంగాల్లోనూ భారత్ తన సామర్థ్యాన్ని పెంచుకుంటోందని తెలిపారు. దేశంలో సెమీకండక్టర్‌ తయారీ, సాంకేతిక మౌలిక వసతులను మరింత అభివృద్ధి చేసేందుకు ప్రభుత్వం చర్యలు తీసుకుంటోందని చెప్పారు.
2026 బ్రిక్స్ సదస్సులో సభ్య దేశాలు ఏకగ్రీవంగా ఆమోదించిన న్యూఢిల్లీ డిక్లరేషన్‌లో ప్రపంచ పాలనలో సంస్కరణలు, బహుళపక్ష వ్యవస్థను బలోపేతం చేయడం, ఆర్థిక సహకారం, సుస్థిర అభివృద్ధి, అంతర్జాతీయ శాంతి, ఉగ్రవాదంపై పోరాటం వంటి పలు అంశాలకు ప్రాధాన్యం ఇచ్చారు. ఐక్యరాజ్యసమితి భద్రతా మండలితో పాటు అంతర్జాతీయ సంస్థల్లో సంస్కరణల అవసరాన్ని కూడా డిక్లరేషన్‌ ప్రస్తావించింది.
బ్రిక్స్ సదస్సు ముగిసిన సందర్భంగా భారత్ నిర్వహించిన సదస్సు విజయవంతమైందని, 2026లో భారత బ్రిక్స్ అధ్యక్షతలో చేపట్టిన కార్యక్రమాలు సంస్థ సహకారాన్ని మరింత బలోపేతం చేశాయని డిక్లరేషన్‌లో సభ్య దేశాలు పేర్కొన్నాయి. 2027లో బ్రిక్స్ అధ్యక్ష బాధ్యతలను చైనా చేపట్టనుంది.