రూ.4,000 కోట్ల ‘రామాయణం’కు ముందు యశ్ జీవితం: రూ.14 జీతం తీసుకునే బస్సు డ్రైవర్ కుమారుడి నుంచి..పాన్ ఇండియా స్టార్గా ఎదిగిన ప్రయాణం
Yash ప్రస్తుతం టాక్సిక్, రామాయణం వంటి భారీ చిత్రాలతో దేశవ్యాప్తంగా చర్చనీయాంశంగా మారారు. అయితే ఈ విజయాల వెనుక ఎన్నో కష్టాలు, త్యాగాలు దాగి ఉన్నాయి.
యశ్ తండ్రి కర్ణాటకలో బస్సు డ్రైవర్గా పనిచేసేవారు. ఒకప్పుడు ఆయన రోజుకు కేవలం రూ.14 మాత్రమే సంపాదించేవారు. ఈ విషయాన్ని యశ్ తండ్రి ఓ ఇంటర్వ్యూలో స్వయంగా వెల్లడించారు. కుటుంబాన్ని పోషించేందుకు ఎంతో కష్టపడ్డానని, కొడుకు మంచి జీవితాన్ని గడపాలని కఠినంగా పెంచానని చెప్పారు.
చిన్నప్పటి నుంచే నటుడిగా మారాలన్న కలతో ఉన్న యశ్, కేవలం రూ.300 జేబులో పెట్టుకుని ఇంటి నుంచి బెంగళూరుకు వెళ్లిపోయారు. పెద్ద నగరంలో ఎవరూ తెలియని పరిస్థితుల్లో ఎన్నో ఇబ్బందులు ఎదుర్కొన్నారు. డబ్బుల్లేక చిన్న హోటళ్లలో తిని, “స్టార్ అయిన తర్వాత డబ్బులు చెల్లిస్తాం” అని చెప్పిన రోజులు కూడా ఉన్నాయని ఆయన గుర్తు చేసుకున్నారు.
ఒకసారి సహాయ దర్శకుడిగా అవకాశం వచ్చిన సినిమా మధ్యలోనే ఆగిపోవడంతో యశ్ మళ్లీ రోడ్డున పడ్డారు. ఆ రాత్రి బస్ స్టాప్లో నిద్రించాల్సి వచ్చింది. పోలీసులు తరిమేస్తారేమో అన్న భయంతో గడిపిన ఆ రాత్రే “ఏ పరిస్థితుల్లోనైనా స్టార్ అవ్వాలి” అని తనలో తాను ప్రతిజ్ఞ చేసుకున్నట్లు యశ్ తెలిపారు.
టెలివిజన్ సీరియల్తో నటుడిగా కెరీర్ ప్రారంభించిన యశ్, తర్వాత కన్నడ సినిమాల్లో అవకాశాలు దక్కించుకుని, KGF సినిమాలతో దేశవ్యాప్తంగా గుర్తింపు పొందారు.
ఇప్పుడు ఆయన టాక్సిక్తో పాటు సుమారు రూ.4,000 కోట్ల బడ్జెట్తో తెరకెక్కుతున్న ‘రామాయణం’ చిత్రంలో నటించడమే కాకుండా సహ నిర్మాతగానూ వ్యవహరిస్తున్నారు.
విజయం సాధించిన తర్వాత కూడా యశ్ తండ్రి రిటైర్మెంట్ వరకు బస్సు డ్రైవర్ ఉద్యోగాన్నే కొనసాగించడం విశేషం. “మన మూలాలను ఎప్పుడూ మర్చిపోకూడదు” అనే కుటుంబ విలువలకు ఇది నిదర్శనమని యశ్ చెప్పుకొచ్చారు.