టాటా కన్సల్టెన్సీ సర్వీసెస్ (TCS) ఉద్యోగులకు ఇచ్చిన కంపెనీ ల్యాప్టాప్లలో Digital User Experience Monitoring (DUEM) అనే మానిటరింగ్ టూల్ను ఏర్పాటు చేస్తున్నట్లు ఒక నివేదిక తెలిపింది.
ఈ టూల్ ద్వారా ఉద్యోగులు ల్యాప్టాప్లో ఏయే అప్లికేషన్లు ఉపయోగిస్తున్నారు, వాటిపై ఎంత సమయం గడుపుతున్నారు అనే విషయాలను కంపెనీ తెలుసుకునే అవకాశం ఉంది.
TCSలో దాదాపు 6 లక్షల మంది ఉద్యోగులు ఉన్న నేపథ్యంలో ఈ విషయం చర్చనీయాంశంగా మారింది. కంపెనీకి చెందిన ల్యాప్టాప్లలో డేటా భద్రతను కాపాడటం, కంపెనీ సమాచారాన్ని బయటకు వెళ్లకుండా చూడటం వంటి కారణాల కోసం ఇలాంటి టూల్ను ఉపయోగిస్తున్నట్లు తెలుస్తోంది.
అయితే ఇక్కడే అసలు ప్రశ్న మొదలైంది.
సైబర్ సెక్యూరిటీ పేరుతో ఉద్యోగుల పని తీరును ఎంతవరకు గమనించాలి?
ఉద్యోగి ఏ యాప్ వాడుతున్నాడు? ఎంతసేపు వాడుతున్నాడు? ల్యాప్టాప్లో ఏం చేస్తున్నాడు? వంటి వివరాలు సేకరిస్తే, అది భద్రత కోసం చేస్తున్న పర్యవేక్షణా? లేక ఉద్యోగిపై నిఘా పెట్టడమా? అనే చర్చ మొదలైంది.
ఇంకా ముఖ్యంగా ఎలాంటి డేటాను సేకరిస్తున్నారు, ఆ డేటాను ఎవరు చూస్తారు, ఎంతకాలం భద్రపరుస్తారు, ఉద్యోగులకు పూర్తిగా సమాచారం ఇచ్చారా అనే విషయాలపై స్పష్టత లేదని నివేదికలు చెబుతున్నాయి.
అందుకే ఈ వ్యవహారం ఇప్పుడు ఒక పెద్ద ప్రశ్నను ముందుకు తెచ్చింది:
“కంపెనీ డేటాను కాపాడటం అవసరమే.. కానీ ఉద్యోగి వ్యక్తిగత గోప్యతకు హద్దు ఎక్కడ?”
TCS ఈ మానిటరింగ్ టూల్ గురించి అధికారికంగా పూర్తి వివరాలను వెల్లడించకపోవడంతో, ఈ ప్రశ్నలకు ఇంకా సమాధానాలు రావాల్సి ఉంది.