కర్ణాటక ఎమ్మెల్సీ ఎన్నికల్లో బీజేపీ–జేడీఎస్ జోరు.. కాంగ్రెస్‌కు షాక్!

కర్ణాటక శాసన మండలి (MLC) ఎన్నికల ఫలితాల్లో అధికార కాంగ్రెస్ పార్టీకి గట్టి ఎదురుదెబ్బ తగిలింది. బీజేపీ, దాని మిత్రపక్షమైన జనతాదళ్ (సెక్యులర్) కూటమి నాలుగు స్థానాల్లోనూ విజయం సాధించింది. బీజేపీ మూడు స్థానాలను గెలుచుకోగా, జేడీఎస్ ఒక స్థానాన్ని కైవసం చేసుకుంది. దీంతో నాలుగు స్థానాల్లో పోటీ చేసిన కాంగ్రెస్ ఒక్క సీటు కూడా గెలుచుకోలేకపోయింది. ఈ ఫలితాలు రాష్ట్ర రాజకీయాల్లో చర్చకు దారితీశాయి.

అక్టోబర్ 23న ఈ నాలుగు ఎమ్మెల్సీ స్థానాలకు పోలింగ్ జరిగింది. ఉపాధ్యాయులు, పట్టభద్రుల నియోజకవర్గాలకు సంబంధించిన ఈ ఎన్నికలు బీజేపీ–జేడీఎస్ మధ్య ఎన్నికల సమన్వయానికి పరీక్షగా నిలిచాయి. రెండు పార్టీలు పరస్పర అవగాహనతో అభ్యర్థులను బరిలోకి దించగా, ఓటర్ల మద్దతును తమవైపు తిప్పుకోవడంలో విజయం సాధించాయి.

బెంగళూరు ఉపాధ్యాయుల నియోజకవర్గంలో జేడీఎస్ అభ్యర్థి ఏపీ రంగనాథ్ విజయం సాధించారు. కాంగ్రెస్‌కు చెందిన సిట్టింగ్ ఎమ్మెల్సీ పుట్టన్నపై ఆయన 908 ఓట్ల ఆధిక్యంతో గెలుపొందారు. రంగనాథ్‌కు 10,810 ఓట్లు రాగా, పుట్టన్నకు 9,902 ఓట్లు వచ్చాయి. గతంలో జేడీఎస్‌లో ఉన్న పుట్టన్న కాంగ్రెస్‌లో చేరిన నేపథ్యంలో ఈ పోటీ రెండు పార్టీలకు ప్రతిష్ఠాత్మకంగా మారింది.

ఈశాన్య ఉపాధ్యాయుల నియోజకవర్గంలో బీజేపీ సిట్టింగ్ ఎమ్మెల్సీ శశిల్ జి. నమోషి కాంగ్రెస్ అభ్యర్థి శరణప్ప మత్తూర్‌పై విజయం సాధించారు. నమోషికి 15,596 ఓట్లు రాగా, మత్తూర్‌కు 12,299 ఓట్లు వచ్చాయి. 3,297 ఓట్ల ఆధిక్యంతో నమోషి గెలుపొందారు. ఈ నియోజకవర్గంలో ఆయనకు ఇది ఐదో విజయం కావడం విశేషం. కాంగ్రెస్ అధ్యక్షుడు మల్లికార్జున ఖర్గే సొంత ప్రాంతమైన కలబురగి కూడా ఈ నియోజకవర్గ పరిధిలో ఉండటంతో ఫలితానికి రాజకీయ ప్రాధాన్యం ఏర్పడింది.

పశ్చిమ పట్టభద్రుల నియోజకవర్గంలో బీజేపీ అభ్యర్థి ఎస్.వి. శంకనూరు కాంగ్రెస్ అభ్యర్థి మోహన్ లింబికాయిపై 9,323 ఓట్ల ఆధిక్యంతో విజయం సాధించారు. ఆగ్నేయ పట్టభద్రుల నియోజకవర్గంలోనూ బీజేపీ అభ్యర్థి కె.ఎం. సురేశ్ కాంగ్రెస్ అభ్యర్థి శశి హులికుంటె ముత్తును ఓడించారు. దీంతో బీజేపీ తన ఆధీనంలో ఉన్న మూడు స్థానాలను నిలబెట్టుకోగా, బెంగళూరు ఉపాధ్యాయుల స్థానాన్ని జేడీఎస్ కాంగ్రెస్ నుంచి కైవసం చేసుకుంది.

ఈ ఫలితాలపై బీజేపీ కర్ణాటక విభాగం కాంగ్రెస్ నేత, ఉప ముఖ్యమంత్రి డీకే శివకుమార్‌ను లక్ష్యంగా చేసుకుని విమర్శలు చేసింది. “డీకే, అయిపోయింది బ్రో!” అంటూ నాలుగు స్థానాల్లోనూ ఎన్డీఏ కూటమి విజయం సాధించిందని సోషల్ మీడియాలో పోస్టు చేసింది. శివకుమార్ గతంలో నిర్వహించిన నిరసనకు సంబంధించిన ఫొటోను ఉపయోగిస్తూ కాంగ్రెస్ ఓటమిపై సెటైర్లు వేసింది.