ప్రధాని నరేంద్ర మోదీ ఫ్లై దుబాయ్ విమానంలో పెను ప్రమాదాన్ని తప్పించిన భారత పైలట్ కెప్టెన్ స్మిత్ మచ్ఛర్‌ను ‘హీరో’గా అభివర్ణించారు. తీవ్ర గాయాలతో ఉన్నప్పటికీ ప్రాణాలను లెక్కచేయకుండా ఆయన చూపిన ధైర్యం, సమయస్ఫూర్తి వల్ల 174 మంది ప్రయాణికుల ప్రాణాలు కాపాడగలిగామని మోదీ పేర్కొన్నారు.
దుబాయ్ నుంచి ఇజ్రాయెల్‌లోని టెల్ అవీవ్‌కు వెళ్తున్న ఫ్లై దుబాయ్ FZ1073 విమానంలో ఈ ఘటన చోటుచేసుకుంది. విమానంలో 174 మంది ప్రయాణికులు ఉన్నారు. విమానం గాల్లో ఉండగానే కో-పైలట్ కెప్టెన్ స్మిత్ మచ్ఛర్‌పై కత్తితో దాడి చేసినట్లు ఇజ్రాయెల్ అధికారులు తెలిపారు. ఆ తర్వాత విమానం ఒక్కసారిగా భారీగా కిందికి దూసుకెళ్లింది.
తీవ్రంగా గాయపడిన కెప్టెన్ స్మిత్ రక్తస్రావంతో కాక్‌పిట్‌లోనే కుప్పకూలిపోయినప్పటికీ కీలక సమయంలో కాక్‌పిట్ తలుపును తెరిచారు. దీంతో కొంతమంది ప్రయాణికులు, సిబ్బంది లోపలికి వెళ్లి కో-పైలట్‌ను అదుపులోకి తీసుకునేందుకు ప్రయత్నించారు. విమానంలో ప్రయాణిస్తున్న మరో ఇద్దరు ఆఫ్-డ్యూటీ పైలట్లు కూడా కాక్‌పిట్‌లోకి వెళ్లి విమానాన్ని నియంత్రణలోకి తీసుకున్నారు.
విమానం దాదాపు 14,000 అడుగుల మేర కేవలం 30 సెకన్లలోనే పడిపోయినట్లు ఫ్లైట్ ట్రాకింగ్ వివరాలు సూచిస్తున్నాయి. మరో నివేదిక ప్రకారం విమానం 34,000 అడుగుల ఎత్తు నుంచి 17,000 అడుగులకు పైగా వేగంగా దిగింది. పరిస్థితి అదుపు తప్పుతున్న సమయంలో ప్రయాణికులు కూడా ధైర్యంగా స్పందించడంతో విమానం ప్రమాదం నుంచి బయటపడింది.
కెప్టెన్ స్మిత్ కాక్‌పిట్ తలుపు తెరవడం ఈ ఘటనలో అత్యంత కీలకమైన పరిణామంగా మారింది. ఆ తర్వాత ప్రయాణికులు కో-పైలట్‌ను అదుపులోకి తీసుకున్నారు. విమానంలో ఉన్న మరో ఇద్దరు పైలట్లు కంట్రోల్స్ చేపట్టి విమానాన్ని సౌదీ అరేబియాలోని తబూక్ విమానాశ్రయంలో అత్యవసరంగా ల్యాండ్ చేశారు.
విమానంలో జరిగిన ఘటనను ఇజ్రాయెల్ ప్రధాని బెంజమిన్ నెతన్యాహు కూడా తీవ్రంగా ప్రశంసించారు. కెప్టెన్ స్మిత్ మచ్ఛర్‌ను ‘నిజమైన హీరో’గా పేర్కొంటూ, తీవ్రంగా గాయపడినప్పటికీ ఆయన పోరాడి ప్రయాణికుల ప్రాణాలను కాపాడేందుకు సహకరించారని తెలిపారు. అమెరికా అధ్యక్షుడు డొనాల్డ్ ట్రంప్ కూడా స్మిత్ ధైర్యాన్ని ప్రశంసించారు.
ఈ ఘటనపై ప్రధాని మోదీ కెప్టెన్ స్మిత్ భార్య, తల్లిదండ్రులతో కూడా మాట్లాడినట్లు ప్రభుత్వ వర్గాలు తెలిపాయి. ఆయన ఆరోగ్య పరిస్థితిపై వివరాలు తెలుసుకున్న మోదీ, భారత దౌత్య సిబ్బంది అన్ని విధాలా సహాయం అందిస్తున్నారని చెప్పినట్లు సమాచారం.