అమెరికా అధ్యక్షుడు డొనాల్డ్ ట్రంప్ మరోసారి అంతర్జాతీయ రాజకీయాల్లో చర్చనీయాంశంగా మారారు. రష్యా నుంచి చమురు కొనుగోలు చేస్తోందంటూ భారత్‌పై భారీ సుంకాలు విధించిన ట్రంప్.. ఇప్పుడు అమెరికా అవసరాల కోసం రష్యా అధ్యక్షుడు వ్లాదిమిర్ పుతిన్‌తో డీజిల్ కొనుగోలు ఒప్పందం చేసుకోవడం విమర్శలకు దారితీస్తోంది. భారత్‌పై ఆంక్షలు విధిస్తూ, అమెరికా మాత్రం రష్యా నుంచి ఇంధనం కొనుగోలు చేయడం ద్వంద్వ ప్రమాణాలకు నిదర్శనమనే విమర్శలు వినిపిస్తున్నాయి.
అక్టోబర్ 9న పుతిన్‌తో చర్చలు జరిపిన అనంతరం రష్యా అమెరికాకు వెంటనే 3 లక్షల టన్నులకు పైగా డీజిల్ సరఫరా చేయనున్నట్లు ట్రంప్ ప్రకటించారు. నవంబర్‌లో మరో 5 లక్షల టన్నులు, ఆ తర్వాత అదనపు సరఫరా ఉంటుందని తెలిపారు. అమెరికాలో పెరుగుతున్న ఇంధన ధరలను తగ్గించడం, ముఖ్యంగా రైతులు, ట్రక్కు డ్రైవర్లకు ఉపశమనం కల్పించడం ఈ ఒప్పందం ప్రధాన ఉద్దేశమని ట్రంప్ పేర్కొన్నారు.
అమెరికాలో డీజిల్ ధరలు పెరగడానికి మధ్యప్రాచ్యంలో ఉద్రిక్తతలు, ఇరాన్‌తో యుద్ధ పరిస్థితులు, హార్ముజ్ జలసంధి మూసివేత వంటి పరిణామాలు కారణమయ్యాయి. దీంతో రవాణా ఖర్చులు, వ్యవసాయ రంగంపై భారం పెరిగింది. నవంబర్‌లో జరగనున్న అమెరికా మధ్యంతర ఎన్నికలకు ముందు ఇంధన ధరలను తగ్గించి ప్రజలకు ఉపశమనం కల్పించాలనే ఉద్దేశంతో ట్రంప్ ఈ నిర్ణయం తీసుకున్నట్లు విశ్లేషకులు భావిస్తున్నారు. ఈ ఒప్పందంలో భాగంగా రష్యా డీజిల్ ఎగుమతులపై ఉన్న ఆంక్షలను 2027 ఏప్రిల్ వరకు తాత్కాలికంగా సడలించే అవకాశం ఉందని నివేదికలు పేర్కొన్నాయి.
ఇదే సమయంలో రష్యా నుంచి చమురు కొనుగోలు చేస్తున్న భారత్‌పై ట్రంప్ గతంలో అదనంగా 25 శాతం సుంకాలు విధించారు. దీంతో కొన్ని భారతీయ వస్తువులపై మొత్తం సుంకాలు 50 శాతానికి చేరాయి. రష్యా నుంచి చమురు కొనుగోలు చేయడం ద్వారా ఉక్రెయిన్ యుద్ధానికి పరోక్షంగా నిధులు అందుతున్నాయని అమెరికా అప్పట్లో వాదించింది. భారత్ మాత్రం తన ఇంధన అవసరాలు, ధరలు, దేశ ప్రయోజనాలను దృష్టిలో పెట్టుకునే నిర్ణయాలు తీసుకుంటున్నామని స్పష్టం చేసింది. భారత్ తన చమురు అవసరాల్లో ఎక్కువ భాగాన్ని దిగుమతుల ద్వారానే తీర్చుకుంటోంది.
రష్యా నుంచి చమురు కొనుగోలు చేసే దేశాలపై 100 శాతం వరకు సుంకాలు విధించే అధికారాన్ని అమెరికా అధ్యక్షుడికి కల్పించే చట్టం కూడా చర్చకు వచ్చింది. అయితే, ఇప్పుడు అదే రష్యా నుంచి అమెరికా డీజిల్ కొనుగోలు చేయడం వల్ల ఆ విధానంపై ప్రశ్నలు తలెత్తుతున్నాయి. “అమెరికా తనపై తానే సుంకాలు విధించుకుంటుందా?” అంటూ అమెరికా పరిశోధనా సంస్థ కాటో ఇన్‌స్టిట్యూట్‌కు చెందిన స్కాట్ లింకోమ్ వ్యంగ్యంగా ప్రశ్నించారు. భారత్‌పై ఒత్తిడి తెచ్చిన అమెరికా ఇప్పుడు తన అవసరాల కోసం అదే రష్యాతో ఒప్పందం చేసుకోవడం ద్వంద్వ వైఖరిని బయటపెడుతోందని పలువురు విశ్లేషకులు అభిప్రాయపడుతున్నారు.