ట్రైన్‌లో ప్రయాణం తనకు తీవ్ర అసౌకర్యంగా మారిందని బీజేపీ ఎంపీ తేజస్వి సూర్య భార్య, ప్రముఖ కళాకారిణి శివశ్రీ స్కందప్రసాద్‌ తెలిపారు. దాదాపు 40 మంది ప్రయాణికుల గుంపు కోచ్‌లో పెద్దగా మాట్లాడటం, నవ్వుకోవడం, వ్యక్తిగత ప్రదేశాన్ని పట్టించుకోకపోవడంతో తన ప్రయాణం ‘ట్రామాటిక్‌’గా మారిందని ఆమె సోషల్‌ మీడియా పోస్టులో వివరించారు.
శివశ్రీ తెలిపిన వివరాల ప్రకారం.. 56 మంది ప్రయాణికులు ప్రయాణించే కోచ్‌లో దాదాపు 40 మంది మధ్య వయస్కులు ఒకేసారి ప్రయాణిస్తున్నారు. వీరంతా దాదాపు ఐదు గంటల పాటు నిరంతరం పెద్దగా మాట్లాడుకుంటూ, నవ్వుకుంటూ ఉన్నారని ఆమె పేర్కొన్నారు. పబ్లిక్‌ ప్లేస్‌లో ఇతరుల వ్యక్తిగత స్థలాన్ని, ప్రశాంతతను గౌరవించాల్సిన అవసరం ఉందని ఆమె అన్నారు.
తాను ఒక కళాకారిణినని, నిశ్శబ్దంగా ఉండే వాతావరణంలో తన ఆలోచనలకు మరింత స్వేచ్ఛ ఉంటుందని శివశ్రీ తెలిపారు. పెద్ద గ్రూపుగా ప్రయాణిస్తున్నప్పుడు మొదట్లో ఉత్సాహంగా ఉండటం సహజమేనని, అయితే గంటల తరబడి అదే విధంగా పెద్దగా మాట్లాడటం, నవ్వడం వల్ల ఇతర ప్రయాణికులకు ఇబ్బంది కలుగుతుందని పేర్కొన్నారు.
ఈ సమస్యపై ఆమె ట్రైన్‌ టికెట్‌ ఎగ్జామినర్‌ (TTE)ను సంప్రదించి మరో కోచ్‌కు మార్చాలని కోరారు. అయితే ట్రైన్‌ పూర్తిగా నిండిపోవడంతో మరో కోచ్‌లో సీటు ఇవ్వడం సాధ్యం కాలేదని, దీంతో అదే కోచ్‌లో మరో సీటుకు మారాల్సి వచ్చిందని ఆమె తెలిపారు.
కొంతసేపటి తర్వాత ఆ గుంపులోని ఎనిమిది మంది కలిసి UNO కార్డ్స్‌ గేమ్‌ ఆడటం ప్రారంభించారని శివశ్రీ చెప్పారు. అప్పటికే వారు పెద్దగా మాట్లాడటం, నవ్వడం కొనసాగిస్తున్నారని.. దీనిపై మరోసారి TTEను సంప్రదించానని తెలిపారు. TTE ఆ గుంపును గేమ్‌ ఆపాలని కోరగా, వారు వెంటనే ఆపారని చెప్పారు.
అయితే కొద్దిసేపటి తర్వాత TTE తిరిగి వచ్చి వారిని వ్యంగ్యంగా ప్రశ్నించారని శివశ్రీ తెలిపారు. దానికి ఆ ప్రయాణికులు నవ్వుతూ TTEను కూడా తమతో కలిసి గేమ్‌ ఆడాలని ఆహ్వానించారని ఆమె పేర్కొన్నారు.
ఈ ఘటన కేవలం కార్డ్స్‌ గేమ్‌ గురించి కాదని, పబ్లిక్‌ ప్రదేశాల్లో మనుషులు ఎలా ప్రవర్తించాలి అనే విషయానికి సంబంధించినదని శివశ్రీ పేర్కొన్నారు. ఇతర ప్రయాణికులు ప్రశ్నించలేరనే భావన ఉండటం కూడా సమస్యలో భాగమని ఆమె అభిప్రాయపడ్డారు.