భారత్‌లో ఎలక్ట్రిక్ వాహనాల వినియోగం క్రమంగా పెరుగుతోంది. ముఖ్యంగా స్కూటర్లు, బైక్‌లు కొనుగోలు చేయాలనుకుంటున్న వారిలో చాలామంది ఇప్పుడు ఎలక్ట్రిక్ వాహనాల వైపు ఆసక్తి చూపిస్తున్నారు. బోస్టన్ కన్సల్టింగ్ గ్రూప్ (BCG) విడుదల చేసిన తాజా నివేదిక ప్రకారం, దేశంలో టూ వీలర్ కొనుగోలుదారుల్లో 43 శాతం మంది తమ తదుపరి వాహనంగా ఎలక్ట్రిక్ టూ వీలర్‌ను కొనుగోలు చేయాలని పరిశీలిస్తున్నారు. 2024లో ఈ సంఖ్య 30 శాతంగా ఉండేది. అంటే రెండేళ్లలో ఎలక్ట్రిక్ వాహనాలపై ఆసక్తి గణనీయంగా పెరిగింది.
BCG విడుదల చేసిన ‘ఎలక్ట్రిక్ ఇన్ ఛార్జ్: హౌ ఇండియాస్ ఎలక్ట్రిక్ టూ వీలర్స్ ఆర్ మూవింగ్ ఇంటు ద మెయిన్‌స్ట్రీమ్’ నివేదికలో ఈ వివరాలను వెల్లడించారు. ఈ అధ్యయనం కోసం దేశవ్యాప్తంగా 1,600 మంది ప్రస్తుత, భవిష్యత్తు టూ వీలర్ వినియోగదారుల అభిప్రాయాలను సేకరించారు. భారతదేశం ప్రపంచంలోనే అతిపెద్ద టూ వీలర్ మార్కెట్‌గా కొనసాగుతోంది. 2025–26 ఆర్థిక సంవత్సరంలో దేశవ్యాప్తంగా సుమారు 2.219 కోట్ల టూ వీలర్లు అమ్ముడయ్యాయి. ఈ మార్కెట్‌లో స్కూటర్ల అమ్మకాలు వృద్ధికి ప్రధాన కారణంగా నిలుస్తున్నాయి.
ఎలక్ట్రిక్ వాహనాలపై గతంలో ఉన్న వ్యతిరేకత కూడా తగ్గుతోంది. 2024లో ఎలక్ట్రిక్ టూ వీలర్ కొనుగోలు చేయడానికి ఆసక్తి లేదని చెప్పిన వారి శాతం 38గా ఉండగా, 2026లో అది 29 శాతానికి తగ్గింది. ఎలక్ట్రిక్ వాహనాలపై ఆసక్తి ఉన్నప్పటికీ, తక్షణమే కొనుగోలు చేయలేమని చెప్పిన వారు 2024లో 32 శాతం ఉండగా, ప్రస్తుతం 28 శాతానికి తగ్గారు. ఈ గణాంకాలు వినియోగదారులు క్రమంగా ఎలక్ట్రిక్ వాహనాలను అంగీకరిస్తున్నారని సూచిస్తున్నాయి.
దేశంలో ఎలక్ట్రిక్ టూ వీలర్ల అమ్మకాల వాటా కూడా పెరిగింది. 2023–24 ఆర్థిక సంవత్సరంలో మొత్తం టూ వీలర్ అమ్మకాల్లో ఎలక్ట్రిక్ వాహనాల వాటా 5.5 శాతంగా ఉండగా, 2026–27 ఆర్థిక సంవత్సరంలో ఏప్రిల్ నుంచి ఆగస్టు వరకు అది 9.9 శాతానికి చేరింది. స్కూటర్ల విభాగంలో ఎలక్ట్రిక్ వాహనాల వాటా 16.8 శాతం నుంచి 24.1 శాతానికి పెరిగింది. అంటే ప్రస్తుతం దేశంలో అమ్ముడవుతున్న ప్రతి నాలుగు స్కూటర్లలో దాదాపు ఒకటి ఎలక్ట్రిక్ స్కూటర్‌గా ఉంది. ఫెడరేషన్ ఆఫ్ ఆటోమొబైల్ డీలర్స్ అసోసియేషన్స్ (FADA) గణాంకాల ప్రకారం, 2026 సెప్టెంబర్‌లో ఎలక్ట్రిక్ టూ వీలర్ల మార్కెట్ వాటా 11.58 శాతంగా నమోదైంది.
ఎలక్ట్రిక్ వాహనాల డిజైన్, పనితీరు, బ్రాండ్లపై నమ్మకం పెరగడం కూడా ఈ వృద్ధికి కారణమని నివేదిక పేర్కొంది. వాహనాల రూపురేఖలు ఆకర్షణీయంగా ఉన్నాయని భావించే వినియోగదారుల శాతం 2024లో 30గా ఉండగా, 2026లో 59 శాతానికి పెరిగింది. మంచి పికప్ ఉంటుందని భావించే వారి సంఖ్య 27 నుంచి 48 శాతానికి చేరింది. విశ్వసనీయమైన బ్రాండ్‌గా ఎలక్ట్రిక్ వాహనాలను గుర్తించే వారి శాతం 28 నుంచి 46కు పెరిగింది. తక్కువ నిర్వహణ ఖర్చు, తక్కువ రన్నింగ్ ఖర్చు, సౌకర్యం, నిల్వ స్థలం, డిజిటల్ ఫీచర్లు వంటి అంశాల్లోనూ వినియోగదారులు సంతృప్తి వ్యక్తం చేస్తున్నారు.
అయితే, ఎలక్ట్రిక్ వాహనాల విషయంలో కొన్ని సందేహాలు ఇంకా కొనసాగుతున్నాయి. బ్యాటరీ ఎంతకాలం పనిచేస్తుంది, ఒక్కసారి ఛార్జింగ్ చేస్తే ఎంత దూరం ప్రయాణించవచ్చు, సర్వీసింగ్ సులభంగా లభిస్తుందా, గుంతల రోడ్లపై వాహనం ఎలా పనిచేస్తుంది అనే అంశాలపై కొనుగోలుదారులు ఆలోచిస్తున్నారు. పెట్రోల్ వాహనాలతో పోలిస్తే ఎలక్ట్రిక్ వాహనాల దీర్ఘకాలిక మన్నికపై కూడా కొంతమందికి సందేహాలున్నాయి. తయారీ సంస్థలు బ్యాటరీ వారంటీ, సర్వీసింగ్, విడిభాగాల లభ్యత, రీసేల్ విలువ వంటి అంశాలపై మరింత నమ్మకాన్ని కల్పిస్తే ఎలక్ట్రిక్ వాహనాల అమ్మకాలు మరింత పెరిగే అవకాశం ఉంది.