హైదరాబాద్‌కు చెందిన సాఫ్ట్‌వేర్ డెవలపర్ పంకజ్ కుమార్‌కు టీసీఎస్ నుంచి భారీ జీతం ఆఫర్ వచ్చినట్లు ఆయన స్వయంగా సోషల్ మీడియాలో వెల్లడించారు. ప్రస్తుతం EYలో పనిచేస్తున్న ఆయన వార్షిక CTC రూ.50 లక్షలకు పైగా ఉందని, అయినప్పటికీ TCS మేనేజీరియల్ స్థాయి ఉద్యోగం కోసం ఇంటర్వ్యూలో 25 శాతం జీతం పెంపును ఆఫర్ చేసిందని తెలిపారు.
పంకజ్ కుమార్‌కు ఎంటర్‌ప్రైజ్ అప్లికేషన్ల అభివృద్ధిలో 10 ఏళ్లకు పైగా అనుభవం ఉంది. TCSలోని ఎకోస్పేస్ క్యాంపస్‌లో మేనేజీరియల్ స్థాయి ఉద్యోగానికి ఫైనల్ రౌండ్ ఇంటర్వ్యూకు హాజరైనట్లు ఆయన చెప్పారు. ఇంటర్వ్యూకు వెళ్లే ముందు తన జీతం అంచనాలను కంపెనీ అందుకోగలదా లేదా అనే విషయాన్ని స్పష్టంగా తెలుసుకోవాలనుకున్నట్లు తెలిపారు.
తన ప్రస్తుత CTC రూ.50 లక్షలకు పైగా ఉందని, కొత్త ఉద్యోగంలో అదే CTCను మ్యాచ్ చేయడంతో పాటు 25 శాతం జీతం పెంపు ఇస్తారా అని TCSను మూడుసార్లు అడిగినట్లు పంకజ్ తెలిపారు. కంపెనీ అందుకు అంగీకరించిందని ఆయన తన సోషల్ మీడియా రీల్‌లో వెల్లడించారు.
రూ.50 లక్షల CTCపై 25 శాతం పెంపు లభిస్తే కొత్త వార్షిక ప్యాకేజీ కనీసం రూ.62.5 లక్షలకు చేరుతుంది. అయితే పంకజ్ ప్రస్తుత CTC రూ.50 లక్షల కంటే ఎక్కువగా ఉన్నందున, వాస్తవ ప్యాకేజీ రూ.62.5 లక్షల కంటే ఎక్కువగా ఉండే అవకాశం ఉంది. కొత్త ప్యాకేజీలో వేరియబుల్ పే, ఇతర ప్రయోజనాలు ఎలా ఉంటాయనే దానిపై తుది మొత్తం ఆధారపడి ఉంటుంది.
టీసీఎస్ సాధారణంగా ఫ్రెషర్లకు ఇస్తున్న జీతాలపై సోషల్ మీడియాలో విమర్శలు వస్తుంటాయి. ముఖ్యంగా రూ.3 లక్షల వార్షిక ప్యాకేజీలను ప్రస్తావిస్తూ కొందరు టీసీఎస్‌ను విమర్శిస్తుంటారు. అయితే తన అనుభవాన్ని ఉదాహరణగా చూపిస్తూ.. అన్ని స్థాయిల ఉద్యోగాలకు ఒకే విధమైన జీతాలు ఉండవని, సీనియర్ లేదా ప్రత్యేక నైపుణ్యాలు ఉన్న ఉద్యోగులకు ఎక్కువ ప్యాకేజీలు లభించవచ్చని పంకజ్ పేర్కొన్నారు.
అయితే సోషల్ మీడియాలో కొందరు మాత్రం రూ.50 లక్షలకు పైగా సంపాదిస్తున్న సీనియర్ ప్రొఫెషనల్‌కు 25 శాతం పెంపు కంటే ఇంకా ఎక్కువ ఆఫర్ రావాల్సిందని వ్యాఖ్యానించారు. మరికొందరు పంకజ్‌కు వచ్చిన ఆఫర్‌ను అభినందించారు. ప్రాజెక్ట్ అవసరాలు, ప్రత్యేక టెక్నాలజీ నైపుణ్యాలు వంటి అంశాల ఆధారంగా అనుభవజ్ఞులైన ఉద్యోగులకు ఎక్కువ ప్యాకేజీలు ఉండొచ్చని కొందరు నెటిజన్లు అభిప్రాయపడ్డారు. అయితే ఈ వ్యాఖ్యలకు TCS నుంచి అధికారిక ధృవీకరణ లేదు.