నాసిక్‌లో వీధి కుక్కల సమస్యపై ఫిర్యాదులు పట్టించుకోవడం లేదంటూ కార్యకర్తలు వినూత్న నిరసన చేపట్టారు. మహారాష్ట్రలోని నిఫాడ్ నగర్ పంచాయతీ కార్యాలయంలోకి నేరుగా వీధి కుక్కలను తీసుకెళ్లి, చీఫ్ ఆఫీసర్ టేబుల్‌పై వదిలేశారు. అంతేకాకుండా అధికారి టేబుల్‌పై కరెన్సీ నోట్ల దండను కూడా ఉంచారు.
యువసేన జిల్లా అధ్యక్షుడు విక్రమ్ రంధవే ఆధ్వర్యంలో ఈ నిరసన జరిగినట్లు సమాచారం. నిఫాడ్ పట్టణంలో వీధి కుక్కల సంఖ్య పెరుగుతున్నప్పటికీ అధికారులు తగిన చర్యలు తీసుకోవడం లేదని కార్యకర్తలు ఆరోపించారు. ఈ సమస్యపై పలుమార్లు ఫిర్యాదులు, వినతిపత్రాలు ఇచ్చినా స్పందన కనిపించలేదని వారు తెలిపారు.
వీధి కుక్కల కారణంగా పిల్లలు, మహిళలు, వృద్ధులు, వాహనదారులు తీవ్ర ఇబ్బందులు ఎదుర్కొంటున్నారని నిరసనకారులు పేర్కొన్నారు. ఇప్పటికే పలువురు కుక్కల దాడులకు గురయ్యారని, అయినప్పటికీ సమస్యను పరిష్కరించడంలో అధికారులు నిర్లక్ష్యం చేస్తున్నారని ఆరోపించారు.
ప్రస్తుతం గణేశోత్సవ వేడుకలు కొనసాగుతున్న నేపథ్యంలో వీధి కుక్కల సమస్య మరింత ఇబ్బందికరంగా మారిందని రంధవే అన్నారు. గణేష్ మండపాల వద్దకు వచ్చే ప్రజల్లో భయాందోళన నెలకొంటోందని పేర్కొన్నారు. వెంటనే కుక్కలకు స్టెరిలైజేషన్ కార్యక్రమాలు చేపట్టడంతో పాటు, వాటిని పట్టుకునేందుకు సరైన ఏర్పాట్లు చేసి వీధి కుక్కల సంఖ్యను నియంత్రించాలని డిమాండ్ చేశారు.
అధికారులు ప్రజా సమస్యలను పరిష్కరించకుండా టెండర్ ప్రక్రియలపై దృష్టి పెడుతున్నారని రంధవే ఆరోపించారు. చాలా రోజులుగా ఈ అంశాన్ని అధికారుల దృష్టికి తీసుకెళ్లినా ఇప్పటివరకు కచ్చితమైన చర్యలు తీసుకోలేదని ఆయన అన్నారు.
అధికారులు స్పందించకపోతే మరోసారి ఇదే తరహాలో నిరసన చేపట్టి, ప్రజల సమక్షంలో చీఫ్ ఆఫీసర్ కార్యాలయంలోకి వీధి కుక్కలను తీసుకువస్తామని రంధవే హెచ్చరించారు.
అయితే నాసిక్‌లో జరిగిన తాజా నిరసనలో కుక్కలను సంచుల్లో తీసుకువచ్చి కార్యాలయంలో వదిలేయడం జంతు హింసకు సంబంధించిన ఆరోపణలకు కూడా దారితీసింది. ఈ చర్యపై విమర్శలు వ్యక్తమవుతున్నాయి.